1Cor 15 | PONPDN | STEP | RI ai kan i men kataman kin komail ronamau, me i padaki on komail er, me komail pil aleer o pil tinain kidar.

1 Corinthians 15

1 RI ai kan i men kataman kin komail ronamau, me i padaki on komail er, me komail pil aleer o pil tinain kidar. 2 O me komail pil dore kila, ma komail pan dadaurata masan o, me i padaki on komail er, ma komail so poson mal. 3 Pwe i usaki on komail er, me i pil aleer duen Kristus, me kamata kilar dip atail akan duen kisin likau kan. 4 O me a saredier o kaiasadar ni kasilu en ran duen kisin likau kan, 5 O me a pwara won Kepas, ap on irail me ekriamen ko, 6 Ap kotin pwara won saulan limepuki sama ni ansau takis; kis arail me toto mimieta lei met, a akai mairedier. 7 Murin met a kotin pwara won Iakopus, ap on wanporon akan karos. 8 A ikmuri a kotin pwara don ia mon ai ip sapal, 9 Pwe pokindidi ren wanporon akan nai, me sota war on kaindinda wanporon amen, pweki ai pei on momodisou en Kot. 10 A mak en Kot, me i wanoron kilar. A kaidin mak mal eu on ia, pwe i dodok laud san irail karos, ari kaidik nai, pwe mak en Kot, me mi re i. 11 Ari, ma nai de irail, pwe iduen at padaki wei, o iduen komail posonlar. 12 A ma i aude pan at padak, me Kristus iasadar san ren me melar akan, a da me akai re omail kin inda, dene me melar akan solar pan mauredar? 13 A ma me melar akan sota pan maureda, nan Kristus pil sota iasadar. 14 O ma Kristus sota iasadar, at padak me mal, o omail poson pil me mal. 15 O kitail pil pan diarokada, me se saunkadede likam ren Kot, aki at kadededar, me Kot kotin kaiasadar Kristus, me a so kaiasadar, ma me melar akan sota pan kamaureda. 16 Pwe ma me melar akan sota pan kamaureda, nan Kristus pil so kaiasadar. 17 A ma Kristus so kaiasadar, omail poson me mal, o komail mimieta ni dip omail. 18 Iduen pil irail, me melar ren Kristus akan, lokidokila. 19 A ma kitail kaporoporeki Kristus nan maur et eta, nan kitail me sued san aramas akan karos. 20 A melel, Kristus kaiasadar san ren me melar akan, ap wiala meseni nan pun en ir me mamair akan. 21 Pwe mela tapi san aramas ta men, iduen maureda san ren me melar akan tapi san aramas ta men. 22 Pwe duen karos me mela ki Adam, nan iduen karos pan kamaurela ren Kristus, 23 A amen amen ni kakairokdo: Kristus mas ap me sapwilim en Kristus, ni a pan kotin pwarado; 24 A murin mepukat pan imwi, a lao kotiki on Kot o Sam a wei, a lao kaloedier kaun akan karos, o me poe kan, o manaman akan. 25 Pwe a pan kotin kaunda, lao a imwintiti karos lodi on pan aluwilu a kan. 26 A ikmurin imwintiti iei mela. 27 Pwe a kotin mueid on meakaros pan aluwilu a. Ari ni a kotin masanier me karos lodier a sansaledar, me i sota ian me kotin kaloedi on i meakaros. 28 A meakaros lao lodi on i, Na ap pil pan upan i, me kotin kaloedi on i meakaros, pwe Kot en kotin poedi meakan karusia. 29 A ma me melar akan solar pan kamaureda, da me irail en wia, me kin paptaiseki on me melar akan? Menda re paptaiseki on irail? 30 O menda kit kin kalokolok ansau karos? 31 Pwe ran karos i kin mela, pweki kapin pa i, me i aleer ren Kristus Iesui atail Kaun. 32 A ma i pei on man laualo nan Episus, duen aramas akan kin wiada, da kadepa on ia, ma me melar akan sota pan kamaureda? Kitail en mana o nim, pwe lakap kitail pan mela. 33 Der duki on, me kasoneson komail! Kasoi sued kin kawela tiak mau. 34 Komail ari punala, o pirida o der wiada dip! Pwe akai sasa duen Kot. Mepukat i indai on komail, pwen kanamenokki komail. 35 A ele amen pan inda: Iaduen me melar akan ar pan kamaureda? O iaduen war ar, me re pan maur kida? 36 Pweipwei men koe! Pwe me koe kin kamoredi, sota pan maureda, ma a sota pan mela. 37 O me koe kamoredi, kaidin war ota me pan para, pwe wan korn eu ta, ele wan wit de eu wa toror. 38 A Kot pan kotiki on war a, duen a kotin kupura, o eu eu en war akan pan ale udan mom a. 39 Uduk karos kaidin son ta ieu, pwe eu son uduk en aramas akan, a eu son uduk en man akan, a eu son en manpir akan, a eu son en mam akan. 40 A war lan o war pwel akan mia, a linan en war lan eu son o linan en war pwel eu son. 41 A eu son linan en katipin, o eu linan en maram, o eu linan en usu kan, pwe nan usu kan me wuki pasan ki ar linan eu eu. 42 Nan iduen en me melar akan ar pan maureda. A kin kamoremoredi ap mor pasan, o pan kamaureda so mor pasan. 43 A kin kamoremoredi ni so linan, o pan maureda ni linan; a kin kamoremoredi ni luet, o pan maureda ni manaman; 44 A pan kamoremoredi war pwel o pan kamaureda war nenin; pwe ma war pwel mia, nan a pil pan war nenin. 45 Duen a intinidier: Tapin aramas Adam wiauier, pwen nen maur amen, a Adam tia mur, pwen nen en kamaur. 46 A war nenin kaidin i men mas pwe war pwel, a muri me nenin. 47 Tapin aramas wiaui kida pwel, a aramas kariamen kotido san nanlan. 48 A duen tapin aramas wiauiki pwel, iduen karos me wiauiki pwel o duen men nanlan o, iduen men nanlan kan. 49 O duen kitail wa mom en pwel, iduen kitail pil pan wa mom en lan. 50 Ri ai kan, iet me i men inda: Uduk o nta sota kak sosoki wein Kot; o me mor pasan kan sota pan sosoki me so mor pasan. 51 Kilan, nai me kadiarok on komail kaponepon eu: Kaidin kitail karos pan mela, a kitail karos pan nitwilida. 52 Madan ni marep ta ieu, koronete en muri lao popeuk. Pwe koronete pan popeuk, a me melar akan ap pan kamauredan somor pasan a kitail pan kawilikapada. 53 Pwe mor pasan wet pan kiawikilan so mor pasan; o mela wet kiawikilan somela. 54 A mor pasan wet lao kia wikilan so mor pasan o mela wet kiawikilan somela, masan o ap pan pwaida, me intinidier: Maur kadalala mela. 55 Mela koe, ia om tata? Mela ia om poedi? 56 Mana en mela dip, a manaman en dip kapun. 57 Danke on Kot, pwe a kotiki on kitail, en poediki atail Kaun Iesus Kristus. 58 Ari ri ai kompok kan, komail kelail kaukaule o der wukiwuk sili, a kakairida ni omail wiawia en Kaun o, pwe komail asa, me omail dodok on Kaun o kaidin dodok mal.